Oncekana Atimu

Oncekana atimu, mawa gaman kang landhep
Kanthi temen niat suci, tundhone merbawani ing tata laksita subasita
Oncekana atimu, saka kabeh rereged, saka ukara aja dumeh, yektine mung gawe lali marang purwadaksina.
Aja dumeh kuwasa banjur kumawasa.
Aja dumeh rumangsa brahmana banjur adigang adigung adiguna.
Aja dumeh rumangsa pinter, banjur keminter.
Becik ing ngarsa tuladha, ing madya ambangun karsa.
Marang kang rumangsa sudra, aja banget padha nelangsa lan karanta-ranta.
Langit isih gumelar, isih ana sabda kawedhar.
Oncekana atimu ing wektu iki. Argopeni bakal netepi marang janji suci.

Srandil, November 2015